اورمو  گؤلو  اول  آللاه  آد اولسون

کؤنلوموزده دائیم آللاه یاد اولسون

آذربایجان میللتیمیز شاد اولسون

خوش دوشونک ،خوش چالیشاق ،خوش بیلک

بیر ـ بیر ایله  خوش  دانیشاق  خوش گولک

اورمو گؤلو باهارلارین ، یازلارین

گؤللرینده،اوردک،سونا ،قازلارین

تورکو آشیقلارین تورکو سازلارین

چالیب اوخوسونلار داغیلسین غم لر

آرامیزدان  گئتسین  کدر  سیتم لر

اورمو گؤلو من باغلی یام ائللره

آذربایجانا هم تورکو دیل لره

نیسان یاغمورونا آخان سئل لره

یاغمو وورسون پاسلاریمیز سیلینسین

چیرکین لیک،گؤزل لیک او وقت بیلینسین

یوردوموزون قوروقچوسو تورکوک بیز

باشماق اولمامیشیق هر واخت برؤکوک بیز

تاریخ  بویو  اوجالمیشیق  اوجا ییق

دوشمن لر سانماسین دوشگون قوجاییق

اورمو گؤلو " دده کاتب " هله وار

زامان چرخی باشین قاتیب هله وار

اویانماییر بختی یاتیب هله وار

بیر گون اولا یاتمیش بختی اویانا

غیرت آتی مینیب چاپار میدانا